Kandidati i Partisë Demokratike, Indrit Hoxha, reagoi në një mënyrë të pa parashikuar në Kuvend ditën e sotme, duke refuzuar të marrë mandatin e deputetit në momentin e betimit. Së bashku me deputeten Rudina Hajdari, ai është thirrur më parë edhe në Ambasadën e SHBA-së për të pranuar mandatin e deputetit.
Hoxha ka bërë fillimisht kërkesë në KQZ për të marrë mandatin, por duket se ai kishte planifikuar një tjetër skenar. Ai është shprehur se e ndërmori veprimin në emër të babait të tij ndjerë, Fatmir Hoxha, i burgosur politik në regjimin komunist.
E gjithë loja e luajtur nga Indrit Hoxha, ishte thjesht për të diskredituar publikisht qeverinë në parlamentin për të cilin u shpreh se ndjen neveri.
“Refuzoj te marr mandatin ne një parlament ilegjitim ku ne karrigen e Kryeministrit ulet i biri i njeriut qe firmosi për varjen e poetit Havzi Nela”, u shpreh ai.
Indrit Hoxha lëshoi një valë akuzash ndaj qeverisë, por dhe individëve të përveçëm. Kryetarin e Kuvendit, Gramoz Ruçin, e akuzoi si urdhërues të vrasjes së Arben Brocit dhe shokëve të tij në masakrën e 2 Prillit.
E menjëhershme ka qenë edhe kundërpërgjigja e Ruçit, i cili me shpërfillje pasi i tha se deklaratat mund t'i kishte bërë jashtë parlamentit, i uroi edhe suksese në jetë.
“Këto deklarata mund ti bëje jashtë Parlamentit. Vetë keni kërkuar të merrni mandatin e deputetit. Gjithesesi, suksese në jetë!”, u shpreh Ruçi.
