Tetë vende evropiane, Franca, Belgjika, Danimarka, Luksemburgu, Holanda, Portugalia, Spanja dhe Suedia, kanë nënshkruar një deklaratë të përbashkët ku bëhet thirrje për implemtimin e një strategjie ambicioze për trajtimin e ndryshimeve klimatike. Deklarata parashtron kërkesën për shpenzimin e çerekut të buxhetit të Bashkimit Evropian për luftimin e problemeve të shfaqura prej ngrohjes globale .
Strategjia përfshin edhe propozimin për ndërprerjen e plotë të emetimit të gazrave serrë deri në vitin 2050. Në deklaratë nënvizohet se këto masa duhet të ndërmerren në emër të ruajtjes të së ardhmes së njerëzimit prej ndikimeve thellësisht negative të ndryshimeve klimatike.
Ndërkohë, për ditën e enjte është parashikuar të mbahet në Rumani një Samit mes liderëve të vendeve evropianë. Në krye të agjendës së diskutimeve do të jetë e ardhmja e Evropës dhe strategjia e BE-së për çështjet e klimës përgjatë pesë vjetëve të ardhshëm.
