Ka arritur në 41 numri i pasagjerëve që humbën jetën nga incidenti fatal i avionit “Sukhoi Superjet 100”, i cili teksa bëri një ulje emergjente në aeroportin "Sheremetyevo" të Moskës , u përfshi nga flakët.
Sipas raportimeve të mediave ruse, mes viktimave bëjnë pjesë dy fëmijë dhe një prej stjuardesave të ekuipazhit. “Janë 37 të mbijetuar – 33 pasagjerë dhe katër anëtarë të ekuipazhit”, bën me dije zyrtarja e komisionit hetimor, Yelena Markovskaya.
Në një deklaratë për shtyp, transportuesi kombëtar i Rusisë, Aeroflot, shpjegon se avioni kishte qenë i detyruar të kthehej në aeroport “për arsye teknike”. “Sukhoi Superjet 100” kishte lënë pistën e aeroportit të "Sheremetyevo"-s në orën 18.02 minuta dhe ishte drejtuar për në Murmansk.
Menjëherë pas nisjes, ekuipazhi u përball me një defekt serioz dhe për pasojë lëshoi alarmin. Pas uljes emergjente , motorri i avionit mori flakë në pistë.
