Kreu i shtetit serb, Aleksandër Vuçiç, ka folur mbi Saimitin e Berlinit që do të zhvillohet të hënën mes krerëve të qeverive të Ballkanit Perëndimor, nën përkujdesin e veçantë të kancelares gjermane, Angela Merkel dhe presidentit francez, Emmanuel Macron. "Në Berlin nuk do të ketë shtet tjetër që nuk e ka njohur përveç Bosnjës. Edhe ata do ta bënin atë, por serbët nuk lejojnë. Delegacioni ynë do të jetë i vetmi që do të kundërshtojë idenë e një Kosove të pavarur. Pozicioni ynë nuk është i lehtë, por sa i përket asaj që do të ushtrojnë presion që Serbia të bëjë disa lëshime, askush nuk do ta shohë atë film."-u shpreh Vuçiç nga përmbyllja e punimeve të forumit tre-ditor i quajtur “Një rrip, një rrugë” të Kinës, ku merr pjesë si i ftuar nga lideri Xi Jinping.
Presidenti Vuçiç shpreson që në tryezën e bisedimeve, palët të gjejnë një qasje të ekuilibruar në trajtimin e problemeve që kanë ngërthyer dhe stanjaur marrëdhëniet bilaterale. Në koherencë të plotë me Vuçiçin, kryeministrja Ana Bërnabiç dhe ministri i Jashtëm, Ivica Daçiç, nuk kanë shprehur pritshmëri për arritjen e një zgjidhjeje të dakorduar me Kosovën për rivendosjen e dialogut, pa përmbushjen e parakushtit për heqjen e taksës doganore mbi mallrat dhe produktet serbe.
