Teksa janë numëruar shumica e kutive të votimit të raundit të parë të zgjedhjeve presidenciale, Stevo Pendarovski, kandidati i përbashkët i koalicionit qeveritar në Maqedoninë e Veriut të kryesuar nga LSDM-ja, ka arritur një avantazh të lehtë me 42,72% të votave, kundrejt kandidates së opozitës, Gordana Siljanovska-Davkova, e cila renditet e dyta me një diferencë të papërfillshme prej 0,14 % të rezultatit me 42.58% të votave. Ndërsa, garuesi tjetër, shqiptari Blerim Reka, i cili kandidoi si subjekt elektoral i pavarur me mbështetjen e njëkohshme të partive opozitare “Aleanca për Shqiptarët” dhe “BESA”, pozicionohet i treti në radhë me vetëm 10,35 % të votave, duke u skualifikuar automatikisht nga raundi i dytë i presidencialeve të parashikuar për në datë 5 maj.
Në qendrimin zyrtar të Komisionit Shtetëror të Zgjedhjeve, vlerësohet ecuria e procesit zgjedhor, ku morën pjesë më shumë se 42 % e 1.8 milionë qytetarëve me të drejtë vote. Këto ishin zgjedhjet e gjashta presidenciale, qysh prej shpërbërjes së ish-Republikës Jugosllave në vitin 1991.
Presidenti i Republikës së Maqedonisë së Veriut mandatohet për 5 vjet nga sovrani përmes zgjedhjeve të përgjithshme. Çdo president ka të drejtën e rikandidimit për herë të dytë.
