Favoritët kalojnë të gjithë në gjysëmfinale të Europa League: vetëm një përmbysje në katër dhe është Eintracht Frankfurt që bën historinë, në edicionin e parë të kompeticionit, duke arritur në gjysëmfinale, përmes një suksesi 2-0 që nxjerr KO Benfikën. Shkon mirë për anglezet Chelsea e Arsenal, ndërsa Valencia fiton euroderbin e dytë me Villareal.
Të mundur 4-2 në Lisbonë, por ku luajtën për më shumë se 70 minuta me 10 lojtarë, Eintracht Frankfurt kërkonte dy golat e përmbysjes dhe i gjeti. Gjermanët e vetëm të mbetur në kompeticionet europiane, ishin skuadra që bashkë me Chelsea kishin treguar formën më të mirë të këtij edicioni të Europa League, edhe pse portugezët shpresonin në prekjet magjike të djaloshit të tyre të artë Joao Felix. Goli i shënuar në minutën e 26 nga Kostic i dha moralin e duhur Frankfurt të tentonte më me bindje përmbysjen, që u kompletua 23 minuta nga fundi kur Rode shënoi golin e dytë, që i dha skuadrës së Huetter kalimin historik në katër më të mirat e Europa League.
Nuk pati asnjë problem Arsenal të merrte të drejtën e kalimit në gjysëmfinale në shtëpinë e Napolit. Unai Emery, fitues i tre trofeve, tregoi se e njihte mirë funksionimin e këtyre lloj sfidave, duke e befasuar Ancelotti me avancimin e Ramsey pas shpinës së dy sulmuesve e me Ozil në pankinë. Asnjë minutë për kapitenin e Shqipërisë Elseid Hysaj, që duket se me këtë mungesë në San Paolo i ka dhënë drejtimin e daljes eksperiencës në Napoli. Vendosi Lacazzette, në bashkëpunimin e Meret, në minutën e 36 me një goditje spektakolare dënimi. Një hap në drejtimin e gabuar i bërë nga portieri i Napolit dhe skuadrës së Ancelotti i duhej të shënonte katër gola, gjë që nuk e besonin më as vetë. E sikur të mos mjaftonte eleminimi në Napoli duket se do të shpëthejë edhe një cështje Insigne, që shfaqi hapur mosaprovimin e zëvendësimit...
Chelsea luan spektaklin dhe zbavitjen në Stamford Bridge kundër Slavia Pragë, por në fund nuk është se nuk trembet, për një 4-3 që i mjafton londinezëve për të shkuar në gjysëmfinale. Skuadra e Sarrit, e fortë në avantazhin 1-0 të ndeshjes së parë, e zgjidhi shumë shpejt rrugën e rrjetës me Pedron në minutën e 5. Cekët hutohen dhe shënojnë edhe vetë në portën e tyre, duke mbyllur historinë pas nëntë minutash me autogolin e Deli, përpara se Giroud të bënte tris në të 17. Vetëm atëherë Slavia filloi të dukej dhe shënoi me Soucek, duke ngushtuar rezultatin për një minutë. Pikërisht kështu sepse në të 27 Pedro bën poker dhe Chelsea shuhet. Sevcik shënoi dy herë në pjesën e dytë, duke rrezikuar ndoshta jo kualifikimin e Bluve, por të paktën ti mohonte suksesin në shtëpi Sarrit, që do të ishte problem më vete për teknikun italian.
Valencia kompleton gjysëmfinalistët e Europa League, e ndoshta ishte skuadra që më shumë se të gjithë kishte hedhur hapin që në ndeshjen e parë drejt katër më të mirëve, me fitoren 1-3 në transfertë me Villareal. Nëndetësja e verdhë, në vështirëi në La Liga, të përfshirë në zonën e mbijetesës, nuk mund të bënin rezistencë ndaj skuadrës së Garcias në Mestalla. E në fakt Lato qetësoi situatën që në minutën e 13, përpara se Parejo të vuloste rezultatin në minutën e 54.
