Partizani e shton presionin mbi Kukësin pa luajtur fare: kjo sepse në javën e 29 të Superiores të kuqtë kanë siguruar tre pikët e tavolinës me Kamzën, duke shkuar praktikisht plus 11. Në këtë pikë për Kukësin suksesi bëhet domosdoshmëri, për të mos e lënë titullin kaq shpejt, por kundërshtari është delikat. Gjoka përballet me të shkuarën, kur të presë Flamurtarin e vendit të tretë, që synon jo vetëm Europën, por me një fitore kërcënon edhe vendin e dytë të Bluve, duke qenë se renditja për momentin është 4 pikë larg.
Natyrisht kjo ndeshje fillon dhe merr peshë, edhe për këtë, në kohën kur Partizani shkon gjithnjë e më i sigurtë drejt titullit, por me Kukësin janë tashmë Laci dhe Teuta, që mezi presin rrëzimin e vlonjatëve. Durrsakët pas tre humbjesh në katër ndeshjet e fundit presin në Niko Dovana Tiranën. Skuadra e Shkëmbit ka nevojë për një fitore për të mos hequr dorë nga ëndërra europiane, por përballë ka një skuadër, që ndjen hijet e së shkuarës ta përfshijnë. Vetëm tre pikë larg zonës së rënies nga Kategoria, bardheblutë e Memës ndjejnë rrezikun e një fitore të krutanëve në Korcë.
Skuadra e Devollit është impresionuese në 2019 me 20 pikë të grumbulluara, më mirë se cdo skuadër tjetër (njësoj me Partizanin) dhe shpreson shumë në përgjumjen e Skënderbeut, që është jashtë cdo objektivi, duke kërkuar të arrijnë të përsërisin suksesin e fazës së tretë, edhe pse atëherë i mundën në Redi Maloku. Në tension është edhe Luftëtari, vetëm katër pikë nga zona e rënies, e që duhet të bëjë llogaritë me kurbinasit që me një tjetër disfatë, pas asaj me Kukësin, do të humbisnin kontaktet me zonën europiane të renditjes.
