Rreth 8 mijë libanezë janë zhvendosur deri më tani nga zona e luftimeve përreth kryeqytetit të Libisë, Tripoli-t. Ndërkohë, shpopullimi i epiqendrës së përleshjeve po vazhdon pa ndalur, ka njoftuar zëdhënësi i Organizatës së Kombeve të Bashkuara, Rheal Leblanc-u.
Leblanc-u raporton se krahas të zhvendosurve, me qindra familje kanë mbetur të bllokuara në zonat e prekura nga konflikti. Në javën e shkuar nisi një ofensivë e komandantit ushtarak, Khalifa Haftar, për marrjen e kontrollit të Tripoli-t prej qeverisë së kryeministrit Fayez al-Serraj, që gëzon mbështetjen e OKB-së.
Autoriteti i qeverisë së Al-Serraj nuk njihet nga aleatët e gjeneralit Haftar të administratës paralele në lindje të Libisë, në qytetin Tobruk. Sipas të dhënave të publikuara nga Organizata Botërore e Shëndetësisë, luftimet kanë shkaktuar me dhjetëra të vdekur dhe mbi 300 të plagosur.
Jeta politike në Libi është karakterizuar nga dhuna dhe paqëndrueshmëria e theksuar politike që prej rrëzimit nga pushteti dhe vrasjes së sunduesit Muammar Gaddafi në vitin 2011.
