Presidenti i Sudanit, Omar al –Bashir, është rrëzuar nga pushteti dhe është arrestuar nga forcat ushtarake. Lajmi u bë i ditur nga ministri sudanez i Mbrojtjes, Awad Ibn Ouf, i cili sqaroi se ushtria do të mbikqyrë vendin për një periudhë tranzitore dyvjeçare deri në mbajtjen e zgjedhjeve presidenciale të radhës.
Si rezultat i destabilizmit të jetës politike të vendit, në Sudan është shpallur zyrtarisht gjendja e jashtëzakonshme deri në muajin qershor. “Kushtetuta e Sudanit do të pezullohet dhe pikat kufitare dhe hapësira ajrore do të mbyllen deri në njoftimin e ardhshëm”, ka deklaruar ministri sudanez.
75-vjeçari Omar al-Bashir ka qeverisur Sudanin që prej vitit 1989. Arrestimi i tij i jep fund sundimit autokratik 30-vjeçar, ndaj të cilit sudanezët janë mobilizuar në protesta duke filluar nga 19 dhjetori i vitit të shkuar. Gjatë tubimeve kanë humbur jetën me dhjetra protestues në përleshje me forcat e sigurisë.
Presidenti sudanez është subjekt i një urdhër-arresti ndërkombëtar të lëshuar nga Gjykata Ndërkombëtare Penale (ICC), që e akuzon atë për organizimin e krimeve të luftës dhe të krimeve kundër njerëzimit në rajonin e Darfurit.
