Gjykata Kushtetuese e Koresë së Jugut ka kthyer për rishikim ligjin për ndalimin e aborteve, i cili është cilësuar si antikushtetues nga qeveria e vendit. Sipas këtij ligji që daton në vitin 1953, ndaj grave që zgjedhin praktikën e abortit vendosen sanksione që variojnë nga gjobitja e deri tek burgimi.
Barabar me abortueset mund të penalizohen edhe gjinekologët që asistojnë në procedura aborti. Përjashtim nga rregulli përbëjnë rastet kur fetusi është ngjizur si pasojë e një përdhunimi apo inçesti, si edhe kur mbajtja e fëmijës paraqet rrezikshmëri të lartë për shëndetin e nënës.
Koreja e Jugut është një nga të paktat vende të zhvilluara që ligjërisht e konsideron abortin një vepër kriminale. Ligji në fjalë është rishikuar pa sukses më herët, me nismën e një gjinekologeje që u ndoq penalisht për arsye se kishte trajtuar rreth 70 raste aborti.
Vendimi i Kushtetueses vjen edhe si rezultat i trysnisë së ushtruar nga një lëvizje për të drejtat e grave në vendin aziatik. Përfaqësueset e kësaj bashkësie shprehen se ndalimi i aborteve është pjesë e një paragjykimi të gjerë kundër femrave në vendin aziatik.
Megjithatë, Koreja e Jugut ka një numër të konsiderueshëm evangjelistësh në popullsi, grupim i cili kërkon që aborti të mbetet i paligjshëm, me qëllim që femrat të shkurajohen për ta ndërmarrë një vendim të tillë.
Nga një sondazh publik i realizuar ditën e djeshme, rezultoi se 58 % të të anketuarve përkrahnin shfuqizimin e ligjit për ndalimin e abortit, i cili do të rishikohet deri në fund të vitit 2020.
