Krerët e shteteve dhe të qeverive të 27 vendeve anëtare të Bashkimit Evropian, kanë rënë dakord për shtyrjen e procesit të çanëtarësimit të Britanisë së Madhe nga Unioni deri më datë 31 tetor. Ky vendim u mor dje në Samitin e posaçëm të liderëve të BE-së për gjetjen e një zgjidhjeje konsensuale mbi ecurinë e procesit të Brexit-it, pas bisedimeve tetëorëshe të zhvilluara me dyer të mbyllura.
“Deri në fund të kësaj periudhe, Mbretëria e Bashkuar do të ketë mundësi po ashtu që të anulojë Brexit-in”, u shpreh për mediat presidenti i Këshillit Evropian, Donald Tusk, duke lënë kështu të hapur mundësinë e mbetjes së Britanisë në BE. Tusk shtoi se në rastin e arritjes së mbështetjes së nevojshme parlamentare për marrëveshjen e kryeministres Theresa May, Brexit-i do mund të ndodhë më herët nga afati kohor i përcaktuar.
Kreu i qeverisë britanike u shpreh shpresëplotë se “paketa May”, e hedhur poshtë për tri herë radhazi në Dhomën e Komunëve, do të gjejë miratimin e ligjvënësve deri në muajin qershor. Në të kundërt, britanikët do të jenë të detyruar të votojnë në zgjedhjet evropiane që do të mbahen në datat 23-26 maj, duke bërë që Britania të mbetet anëtare e bllokut edhe përtej datës 1 qershor, kur do të nisë ristrukturimi i institucionit të Parlamentit Evropian.
