Nuk luhet ende me karta të hapura, por është fare pranë, të paktën deri kur objektivi sezonal të jetë arritur. Pozicionimi në zonën Champions, kur avantazhi nga ndjekësit është 5 pikë dhe ndeshjet për tu luajtur janë shtatë, nuk është blinduar akoma. Por Inter nuk ngurron të projektojë të ardhmen, duke e konsideruar të mbyllur aventurën e Luciano Spalletti, të cilit Suning i ka kërkuar këtë mission të fundit për të përmbushur: pastaj një shtrëngim duarsh dhe një lamtumirë. Për Interin që do të vijë, presidenti Steven Zhang i ka kërkuar Beppe Marotta të bindë Antonio Conte e ta bëjë trajnerin zikaltër të epokës post Fair Play Financiar.
Sipas asaj që bën të ditur Gazzetta dello Sport, pikërisht nga ky fakt do të lirohet paga e ish-trajnerit të Chelsea, që pretendon 10 milionë euro, të njëjtën shifër që i kishte garantuar Roman Abramovich në rinovimin e fundit. Kërkesë e lartë (duke patur parasysh që largimi i Spalletti do ti kushtojë klubit rreth 25 milionë) që nuk e ka trembur Suning.
Me Spalletti në dalje (e ardhjen e Conte) mund edhe të ndryshojë e ardhmja e Mauro Icardi. Argjentinasi, mbi të cilin kohët e fundit ka hedhur sytë Atletico Madrid për të zëvendësuar Griezmann, mund të niset për një shifër jo më pak se 75 milionë. Dzeko, Lukaku e Jovic janë emrat për ta zëvendësuar, por Conte nuk dëshiron ta lejojë sulmuesin të largohet, duke e bazuar merkaton në mesfushë, reparti thelbësor për Champions.
