Pas shkarkimit të zëvendësministres së Drejtësisë, Vesna Mikiç, nga kryeministri i Kosovës, Ramush Haradinaj, e cila i quajti bombardimet e NATO-s gjenocid, në të njëjtën linjë është edhe një ministër tjetër i Qeverisë së Kosovës.
Ivan Teodosijeviç, ministër i MAPL-së në Kosovë, e ka quajtur Masakrën e Reçakut një trillim të terroristëve shqptarë, të cilët sipas tij kanë kryer krimet më të mëdha në Kosovë.
“Arsyeja për agresionin në shtetin tonë ka qenë e ashtuquajtura katastrofa humanitare në Kosovë. Masakra e Reçakut ishte një trillim, kurse janë terroristët shqiptarë që trilluan gjithçka, duke kryer krimet më të mëdha në Kosovë, për të cilat deri më sot askush nuk ka përgjegjësi. Kanë kryer krime para agresionit të NATO-s, kanë vrarë serbë të mirë dhe policë në vendet e tyre të punës. Gjakpirjen e tyre e kanë vazhduar gjatë agresionit të NATO-s, dhe pas ardhjes së misionit të ashtuquajtur paqeruajtës në Kosovë”, ka deklaruar ministri Teodosijeviç.
