Partitë nacionaliste europiane kanë njoftuar se kanë krijuar aleancë me qëllim të ndryshimit të balancës së pushtetit në Bashkimin Evropian.
Zëvendëskryeministri i Italisë, Matteo Salvini, nga partia e krahut të djathtë njoftoi krijimin e koalicionit në një konferencë për mediat në Milano. Ai u bashkua me AfD-në e ekstremit të djathtë të Gjermanisë, Partinë e Finlandës dhe Partinë Popullore të Danimarkës, shkruan BBC.
Ata po bëjnë fushatë në zgjedhjet e Parlamentit Evropian që mbahen nga data 23-26 maj. Partitë konkurrojnë në shtete të ndryshme, por planifikojnë të bëjnë një grup parlamentar: Aleanca Evropiane për Popullin dhe Kombet – për të sfiduar fuqinë e partive të qendrës.
“Ne duam të reformojmë Bashkimin Evropian dhe Parlamentin Evropian, pa i shkatërruar ata”, tha ai. “Ne duam të sjellim ndryshime rrënjësore”, nënvizoi Salvini.
