Kjo këngë që do të dëgjoni më poshtë nuk është bërë nga këngëtarja me origjinë shqiptare, por mban titullin “Dua Lipa”.
Amanda Winberg është një këngëtare suedeze e panjohur për ne, por nga sot me siguri që do të kthehet në një personazh të veçantë.
22-vjeçarja e njohur me emrin e artit AMWIN, ka prezantuar së fundmi albumin e saj “AMWIN In Wonderland” dhe ajo që tërheq më shumë vëmendjen për ne është fakti se, një prej këngëve mban emrin e këngëtares shqiptare.
E pyetur për këtë fakt, gjatë një interviste për “Women in pop”, AMWIN është shprehur:
“Dua Lipa është e paparë. Është super ‘hot’, shumë tip dhe shumica e njerëzve do të bënin gjithçka për të, sipas meje. Ashtu siç do të bëja unë në këngë për djalin që kam fiksim. Sinqerisht, kur po bëja këtë këngë ishte personi i parë që më shkoi në mendje: ‘Kush tjetër është më e mirë se akullorja? Uh, Dua Lipa’”.
Kënga “Dua Lipa” është ritmike, por sipas këngëtares ka dhe melankoli.
“Kur bie në dashuri e gjej veten midis këtyre dy emocioneve”, shprehet ajo.
Amanda Winberg u bë e njohur në Suedi në vitin 2015 në programin “Idol”, pasi doli e dyta.
