Sekretari i Përgjithsëhm i NATO-s, Jens Stoltenberg, gjatë një vizite në Gjeorgji është shprehur i bindur se ky shtet do të anëtarësohet në NATO, pavarësisht kundërshtimit të ashpër nga Kremlini.
I pranishëm në Tbilisi, Stoltenberg zhvilloi takime me zyrtarët gjeorgjianë për të parë nga afër ushtrimet ushtarake mes forcave të NATO-s dhe ushtrisë gjeorgjiane. Pranë kryeministrit gjeorgjian, Mamuka Bkhtadze, Stoltenberg u shpreh i bindur që Gjeorgjia do të bëhet anëtare e NATO-s.
“Ne do të vazhdojmë të punojmë së bashku për ta përgatitur anëtarësimin e Gjeorgjisë. Nuk pranojmë që Rusia apo ndonjë fuqi tjetër të vendosë se çfarë mund të bëjnë shtetet anëtare”, tha ai.
Në anën tjetër, Bakhtadze u shpreh se anëtarësimi në NATO është zgjedhje e popullit të Gjeorgjisë.
Gjatë samitit të NATO-s në vitin 2008, NATO ishte pajtuar që Gjeorgjia të bëhet anëtare në këtë aleancë, por ende nuk është caktuar ndonjë datë për anëtarësim, ndonëse perspektiva e këtij shteti është konfirmuar në çdo samit.
Vendi me 3.7 milionë banorë e ka zhvilluar një luftë të shkurtër me Rusinë në gusht të vitit 2008, ndërsa prania e vazhdueshme e trupave ruse në Gjeorgji ka ndikuar në rritjen e tensioneve në rajon, shkruan “Free Europe”.
