"Ka një epidemi brenda skuadrës. Një virus ka goditur tetë futbollistë, mes tyre edhe Piatek". Alarmin e ka dhënë trajneri i Polonisë, Jerzy Brzęczek, në vigjilje të sfidës kundër Letonisë, e vlefshme për kualifikueset e Euro 2020. "I pari që pati këtë problem ishte Milik para ndeshjes me Austrinë - ka shtuar ai - Ndoshta nga ajri i kondicionuar në hotelin e Vienës".
"Tani stafi ynë po punon për të evituar që virusi të mund të shpërndahet në të gjithë skuadrën", ka shtuar Brzeczek. Në ndeshjen e fituar 1-0 nga Polonia kundër Austrisë, sulmuesi i Napolit Milik është zgjedhur titullar, po pastaj u zëvendësua, për shkak se është ndjerë keq. Milanisti Piatek u fut si zëvendësues në të 59' dhe shënoi golin e fitores.
