Edi Rama po bën gjithçka për të ruajtur fasadën e një parlamenti normal. Kryeministri i porositi këtë të hënë deputetët e tij që të flasin në Kuvend, madje të luajnë edhe rolin e opozitës fallco me fjalime kritike ndaj qeverisë.
Këtë porosi kryeministri ia dha deputetëve në mbledhjen e sotme të kryesisë së Partisë Socialiste.
Motivi i kësaj strategjie të re të kryeministrit është që në seancën e së enjtes, punimet në Kuvend të ngjajnë sa më normale, edhe pse opozita e vendit ka ndërprerë përfundimisht marrëdhëniet me këtë institucion.
“Jemi në normalitet parlamentar. Në seanca duhet të flasin të gjithë deputetët. Të nisin diskutimet për kandidatët për këshillat bashkiakë si dhe diskutimet në bashki” - mësohet të jetë shprehur Rama.
Fokusi i seancës së të enjtes do të jetë zhvillimi rural. Gati të gjithë ministrat do flasin për fshatin, çfarë është bërë e çfarë nuk është bërë në këto gjashtë vite qeverisje.
Por, përpos udhëzimeve se çfarë dhe si duhet të flasin deputetët, Rama duket se ka filluar të merret edhe panoramën e ligjvënësve të tij në Kuvend, duke i porositur edhe vendin se ku do të ulen ata.
"Kohë të dëshpëruara kanë nevojë për masa të dëshpëruara." - kjo shprehje e Hipokratit duket se i shkon për shtat ngërçit që po has Rama. Mes këtyre përpjekjeve për të kamufluar vakumin parlamentar, Rama mësohet se ka porositur deputetët në sallë të mos rrinë bashkë me 11 deputetët e 'opozitës së re', me idenë se ata duhet të duken si kundërshtarë politikë.
Një muaj më parë, opozita e bashkuar vendosi të djegë mandatet e saj parlamentare. Me përjashtim të tre deputetëve të opozitës, pjesa dërrmuese iu bashkua idesë së propozuar fillimisht dy vite më parë nga Sali Berisha dhe propozuar zyrtarisht muajin e kaluar nga Lulzim Basha. Pesë protesta janë zhvilluar që prej 16 shkurtit në Tiranë, të ndara mes parlamentit, tashmë inekzistent për opozitën dhe kryeministrisë, ku më të mëdhatë ishin ato të 16 shkurtit dhe kjo e 16 marsit. Edi Rama vazhdimisht i ka mëshuar idesë se nuk ka krizë politike, por një opozitë që del nga shinat pasi nuk fiton dot ndaj tij në zgjedhje. Nga ana tjetër, Basha, Kryemadhi dhe aleatët e vegjël pretendojnë se e vetmja zgjidhje për krizën është largimi i Ramës dhe vendosja e një qeverie tranzitore, që do të mundësojë zgjedhje të drejta dhe të pa kapura nga Rama dhe krimi i organizuar.
©Lapsi.al
