Gara për t'u bërë pjesë e Prokurorisë Speciale do të jetë e hapur deri nesër. Donika Prela, drejtuese e Prokurorisë së Krimeve të Rënda i është shtuar listës së aplikantëve për SPAK. Ajo ka aplikuar ditën e sotme.
Pak kohë më parë, edhe pse pati mjaft akuza në drejtim të Prela-s, ajo arriti të kalonte vettingun e të konfirmohej në detyrë.
Ditën e sotme 5 prokurorë kanë aplikuar për t'u bërë pjesë e SPAK. Ata janë prokurori i Apelit Tiranë, Altin Dumani, prokurorja Enkeleda Osmani, prokuroja në Prokurorinë pranë Gjykatës së Shkallës Parë Tiranë, Elida Kackini (Celami).
Gjithashtu ka aplikuar për të qenë pjesë e SPAK edhe Enkeleda Millonai, Prokurore ne Prokurorinë pranë Gjykatës së Shkallës Parë Elbasan. (Aktualisht me Urdhër të Prokurorisë së Përgjithshme është ne pozicionin e Drejtuesit të kësaj Prokurorie) dhe Prokurori pranë Gjykatës së Shkallës së Parë Vlorë, Maksim Sota.
Deri më tani për të qenë pjesë e SPAK kanë aplikuar 20 prokurorë për 15 vende.
Prokuroria e Posaçme (SPAK) i kryen funksionet e saj në mënyrë të pavarur, nëpërmjet prokurorëve të posaçëm, të cilët emërohen nga Këshilli i Lartë i Prokurorisë.
