Kreu i grupit parlamentar të Partisë Demokratike, Edmond Spaho ka reaguar pas lënies në burg të 6 protestuesve, pjesëmarrës në protestën e 16 shkurtit të opozitës. Spaho është shprehur se i vetmi dëm i bërë prej tyre ka qenë prishja e kërpudhës së kryeministrit.
Sipas tij nuk ka patur asnjë fakt dhe provë për arrestimin e protestuesve.
“Të gjithë të pandehurit deklaruan se ishin në protestë dhe protestonin kundër qeverisë së Edi Ramës, në emër të tyre, të familjeve të tyre për një të ardhme më të mirë. Të gjitha veprimet e gjykatës motivoheshin politikisht. Asnjë fakt, asnjë provë për ato që i akuzojnë, gjoja prishje te pronës publike. Mosrespektim të forcave të rendit. Aty është prishur vetëm kërpudha e kryeministrit.Në asnjë rast nuk pati konfrontim mes policisë dhe qytetarëve. I dënoj me forcë këto veprime të policisë dhe prokurorisë. Fnsh me maska e tërhoqën zavarrë Florenc Hoxhën në sy të familjes dhe fëmijëve. Të pandehurit kërkuan të merrnin pjesë në protestën e ditës së enjte. I bëj thirrje qytetarëve të jenë edhe më shumë në protestë për ta rrëzuar Edi Ramën”, tha ai.
