Studentët bojkotues kanë mbyllur me zinxhirë derën e gjimnazit "Petro Nini Luarasi", në përpjekje për të ndaluar studentët e fakultetit Juridik për të zhvilluar aty mësim pasditen e sotme, meqë në fakultet prej ditësh studentët protestues nuk lejojn kryerjen e mësimit.
Të ndodhur në këto kushte, studentët që kërkojnë të zhvillohet mësim për të mos humbur vitin akademik janë futur përmes një dere tjetër të gjimnazit.
“Do zhvillohet mësim çdo mbasdite tek gjimnazi ‘Petor Nini’. Do ketë mësim dhe të shtunë edhe të diel. Jemi të detyruar për këtë zgjidhje” - ka thënë Dekani i Juridikut, Artan Hoxha.
Dekani iu drejtua dy ditë më parë me një kërkesë Ministrisë së Arsimit, Sportit dhe Rinisë, ku kërkoi ambiente të reja për zhvillimin e procesit mësimor.
Kërkesa e Dekanit erdhi pasi një pjesë e studentëve vijojnë ngujimin në ambientet e këtij fakulteti në shenjë proteste për plotësimin e kërkesave të tyre dhe nuk lejojnë pjesën tjetër të zhvillojë procesin mësimor ne auditore.
