Kur kanë mbetur vetëm 5 muaj nga zgjedhjet vendore, Partia Socialiste ka nisur selektimin e emrave që pritet tu besojë postin e kryebashkiakut të qytetit të Durrësit. Zërat për moskandidimin e kryetarit aktual, Vangjush Dako, duket se kanë vënë përpara kohe në lëvizje strukturat e partisë për të mbështetur emra të ndryshëm për pasuesin e tij.
Në media është lakuar këtë të hënë emri i nënkryetarit aktual të bashkisë, Arbër Braho, që e mban këtë detyrë prej 5 vitesh. Ai është djali i deputetit socialist Spartak Braho, një nga themeluesit e Partisë Socialiste.
Gjatë intervistës në “Opinion” pak kohë më parë Dako e la të hapur mundësinë që të mos kandidojë më duke “pranuar me dëshirë edhe përgjegjësi dhe sfida të reja”. Vetë Braho është shprehur se kjo është një dëshirë e tij, por shton se ende nuk e ka marrë një ftesë të tillë dhe se vendimin do ta marrë kryeministri Rama dhe kryesia e PS-së. ©LAPSI.al
