Fitore titulli. Ashtu duhet të konsiderohet triumfi i Partizanit në Korcë, i pari në tre precedentët sezonalë me Skënderbeun dhe në një moment kyc të kampionatit: me Kukësin që dihat pas shpine, në pritje të një hapi fals. Hap fals që skuadra e Skënder Gegës nuk e bën me Malën që shënon pas tre minutash, me dominimin karakterial në të ftohtin e qytetit juglindor dhe me Telushin që mund ti mbyllte llogaritë me herët. Shqetësimi i vetëm për kryeqytetasit, sepse ka dhe shqetësime, është mungesa e Trashit në javën e ardhshme, për kartonin e kuq në minutën e pestë shtesë.
Partizani e nis 2019 aty ku kishte mbyllur vitin tjetër, me një fitore që i jep kredibilitet në duelin me Kukësin për titull. Ndoshta goli i shënuar që në fillim, apo se Skënderbeu nuk po con më kokë prej 6 ndeshjesh radhazi, nga të cilat 5 humbje, por 4-2-3-1 i Gegës, me Cardoso pas shpinës së Bardhit ishte funksional dhe mund të bënte keq në më shumë raste.
Në të vetmin rast kur korcarët ishin superiorë, ishte minuta e 13 kur lufta me topa bore mbi Ibrahimin dhe këdo lojtar të të kuqve në distancë të afërt, mund të quhet fitorja e vetme e Skënderbeut në këtë ndeshje.
Ndoshta Partizani ka nevojë për pak më shumë qetësi, të mësojë të mbyllë ndeshjet e rëndësishme kur e ka mundësinë, për të mos i dhënë shansin Gripshit ti frikësonte në minutën e 92. Cardoso në fund të pjesës së parë e Telushi nga 11 metra në të 53 ishin raste që nuk duheshin humbur, sidomos kur në bazën e ndërtuar mbi lojtarë të rinj të talentuar Gega pret nga njerëzit e eksperiencës të bëjnë diferencën.
Këtë herë shkoi mirë: fitore dhe 40 pikë në vendin e parë, duke dtyruar tashmë Kukësin të përgjigjet në Kamëz përballë Lacit. Sa për Skënderbeut kontaktet me kreun humbën dhe kriza është totale...
