Ministri i Jashtëm serb Ivica Daçiç është shprehur se nuk mund të tregojë planet që shteti i tij ka për Kosovën.
“Nuk mund që në detaje të tregojë se cili është plani serb në dialogun mes Beogradit dhe Prishtinës, për zgjidhjen e problemit të Kosovës. Presidenti (Aleksandar) Vuçiç prezantoi parimet mbi të cilat duhet të diskutohet (me Prishtinën), por sapo erdhi ideja për publikun, në një farë mënyre u bllokua dialogu”, tha Daçic, shkruajnë mediat serbe.
Sipas Daçiç, Serbia po kërkon një zgjidhje që të jetë e përshtatshme për të dyja palët, por kjo duket tepër e vështirë, pasi secila prej tyre kërkon gjëra deri diku të ndryshme.
“Vendet që e kanë njohur Kosovën interpretojnë se Kosova ka kufijtë e saj, ndërsa qëndrimi ynë publik dhe Kushtetuta thonë se Kosova është pjesë e Serbisë. Në qoftë se ju thoni se ka dy zgjidhje kryesore, njëra se Kosova duhet të jetë e pavarur dhe tjetra se ajo duhet të ketë shkallën më të lartë të autonomisë në kuadër të Serbisë, do të shihni se asnjëra zgjidhje nuk është e pranueshme për të dyja palët”, thuhet më tej në reagimin e tij.
