Figura të njohura në politikën ndërkombëtare kanë komentuar largimin e Ditmir Bushatit nga detyra e ministrit për Europën dhe Punët e Jashtme.
Eurodeputeti Knut Fleckenstein, ka falenderuar ish-ministrin për punën e tij dhe shprehet se rrugët e tyre do të kryqëzohen sërish një ditë.
“Faleminderit për bashkëpunimin shumë të mirë! Unë shpresoj se ne do të takohemi sërish. Herët a vonë rrugët tona do të kryqëzohen prapë. Dhe unë po pres për këtë moment”, shkruan Fleckenstein.
Ministrja e Jashtme e Suedisë, Margot Wallstrom i ka kushtuar gjithashtu një dedikim ish-ministrit.
“Faleminderit Ditmir për punën tuaj, bashkëpunimin e mirë dhe miqësinë! Gjithë të mirat në të ardhmen. Margot Wallstrom”, shkruan ajo.
Ministri gjerman për Europën, Michael Roth, e ka quajtur Bushatin një lider të guximshëm politik dhe një europian të angazhuar.
“Një lider politik i guximshëm, një mik i mirë dhe një europian i angazhuar. Shumë faleminderit i dashur Ditmir Bushati! Do të na mungosh”, shkruan Roth.
