Kryeministri i Greqisë, Aleksis Cipras në një video mesazh drejtuar qytetarëve grekë, ka theksuar se është koha e mësimit të vërtetës rreth Marrëveshjes së Prespës.
“Me Marrëveshjen e Prespës po e mbrojmë Maqedoninë tonë. Ne kapërcejmë frikën dhe hapim rrugën drejt paqes dhe rritjes ekonomike”, thotë Cipras në një video mesazhin e titulluar “E vërteta mbi Marrëveshjen e Prespës”.
Sipas Cipras, kjo marrëveshje është gurthemeli i miqësisë, bashkëpunimit dhe vëllazërisë së vendeve të Ballkanit.
“Fqinjët tanë e dallojnë identitetin e tyre, pranojnë se gjuha e tyre është gjuhë sllave dhe se kultura e tyre në asnjë mënyrë nuk lidhet me trashëgiminë e lashtë greke. Përmes Marrëveshjes së Prespës, ne njohim shtetësinë, jo grupin etnik. Nuk do të ketë aludime irredentiste në tekstet e tyre. Ata po ndryshojnë emrat e monumenteve, të infrastrukturës dhe hapësirës publike”, tha Cipras.
