Konfirmohet ditën e sotme në detyrë nga Komisioni i Pavarur i Kualifikimit prokurorja pranë Prokurorisë së Përgjithshme, Alma Muça.
Mbështetur në tre kritere: rivlerësimin e pasurisë, figurën apo dhe aftësitë profesionale, nga verifikimet e ILDKPKI rezulton se Muça ka bërë deklarim të saktë në përputhje me ligjin.
Pasi u shqyrtuan dhe hetuan të gjithë kriteret, ditën e sotme, Komisioni i Pavarur i Kualifikimit i ka dhënë asaj të drejtën për të vazhduar punën.
KPK ka vlerësuar aftësitë profesionale të Muçës, ndërsa shton se ‘nuk janë gjetur afera korruptive tek denoncimet’.
Muça në fjalën e saj para KPK-së ka kërkuar konfirmimin e saj në detyrë. Komisioni ka pohuar se prokurorja ka burime të ligjshme për të justifikuar pasurinë dhe nuk gjendet në situatën e konfliktit të interesit. Ndër të tjera është thënë se prokurorja disponon dhe një depozitë bankare prej 5 milionë lekësh, të krijuar nga kursimet e pagës në vitet 2014-2015.
