Edhe këtë herë skuadra e Skënder Gegës justifikoi pritshmëritë, madje kundër një kundërshtari edhe më mirë të pozicionuar në Turqi, madje duke treguar personalitet në rikuperimin e një goditje të shpejtë, që mund ti kishte shkatërruar moralisht. Titullarë, apo linjat e dyta, për Partizanin nuk bën asnjë diferencë.
Ashtu si kundër Sivasspor, miqësorja e dytë në fazën përgatitore për Partizanin, përfundon në të njëjtën mënyrë, barazim, e me të njëjtin rezultat 1-1. I vetmi ndryshim ishte se tekniku i kishte besuar nga minuta e parë të gjithë linjave të dyta, duke bërë rrokadën me titullarët vetëm në pjesën e dytë.
Në disavantazh që në minutën e 2-të, kur Sinik befasoi portierin Xhika, kryeqytetasit nuk hoqën dorë nga sistemi i tyre i lojës, duke tentuar barazimin, që në fakt erdhi pas aktivizimit të titullarëve, kur sjellja e të kuqve ishte shumë më agresive. I’u desh vetëm një minutë nga rifillimi Jurgen Bardhit të shënonte golin e barazimit, duke i dhënë besimin se mund të merrej edhe më shumë nga kjo ndeshje. Trashi madje mund të kishte shënuar golin e fitores nga goditja e dënimit, por edhe në barazim Gega kuptoi shumë gjëra nga skuadra, që qendroi e shkurtër, dinamike dhe kërkoi lojën në thellësi, gjithnjë një nga pikat ku insiston tekniku për të ekzaltuar karakteristikat e sulmuesve të tij.
Pas dy barazimeve kundër vendit të 9 dhe 6 në renditje, respektivisht Sivaspor dhe Antalyaspor, të kuqtë kanë tashmë edhe një kundërshtar luksi për të mbyllur miqësoret, atë kundër Dinamo Zagreb në 14 janar.
