Pas publikimit të videos në programin "Stop", ku një gjyqtar në Fier i kërkonte një nëne të divorcuar rryshfet si dhe marrëdhënie seksuale me qëllimin që t'i jepte në këmbim kujdestarinë e fëmijës, Prokuroria pranë Gjykatës së Shkallës së Parë për Krime të Rënda ka njoftuar ditën e sotme nisjen e procedimit penal ndaj tij. Të përfshirë në këtë situatë janë edhe psikologia Elona Meçani, e cila bënte rolin e sekseres si dhe disa gjyqtarë të tjerë.
Njoftimi i plotë i Prokurorisë:
Prokuroria pranë Gjykatës së Shkallës së Parë për Krime të Rënda Tiranë, duke u nisur nga pamjet filmike të transmetuara në datën 08.01.2019 në emisionin “Stop” të televizionit “Klan”, kryesisht, ka regjistruar procedim penal për veprat penale “Ushtrimi i ndikimit të paligjshëm ndaj personave që ushtojnë funksione publike” dhe “Korrupsioni pasiv i gjyqtarëve, prokurorëve dhe funksionarë të tjerë të drejtësisë”, të parashikuara nga nenet 245/1 dhe 319/ç të Kodit Penal.
Në bashkëpunim me Drejtorinë e Policisë së Shtetit janë duke u kryer veprimet e nevojshme hetimore, me qëllim hetimin e plotë të rrethanave të ngjarjes dhe të përgjegjësisë penale të personave të përfshirë.
