Ditën e sotme ka vazhduar protesta e studentëve para godinës së kryeministrisë, ndonëse është vënë re një reduktim i numrit të tyre.
Studentët shprehen, se do të vazhdojnë të protestojnë për kërkesat e tyre dhe për anulimin e ligjit të arsimit të lartë, pavarësisht se numri i tyre është ulur.
“Një pjesë e studentëve mund të kenë përfituar pasiguri. Disa studentë janë rikthyer në auditore, pasi kanë frikë mos humbasin vitin akademik. Nëse nuk bojkotohet dhe shkohet në mësim, thyerje e bojkotit quhet, por ne kuptojmë frikën e tyre. Ata nuk kanë braktisur protestën, por janë përkohësisht në auditorë”- thotë një studente.
Drafti për Universitetin i publikuar nga kryeministri Rama, sipas tyre nuk është i saktë. Ata kërkojnë plotësimin e kërkesave të tyre, jo me VKM por me votë në parlament.
