Ish-deputetja e PD-së, Majlinda Bregu merr zyrtarisht postin e Sekretares së Përgjithshme të Këshillit të Bashkëpunimit Rajonal. Në fjalën e saj të parë në këtë post të ri, Bregu u shpreh se Ballkani Perëndimor duhet të qëndrojë i bashkuar dhe të forcojë marrëdhëniet.
Sipas Bregut, në të ardhmen duhet të ndodhë integrimi i ekonomive të vendeve të Ballkanit Perëndimor në një treg të vetëm, lidhja e njerëzve dhe bashkëjetësa e vlerave; investimi në kapitalin njerëzor dhe intelektual.
Më poshtë, fjalimi i saj në këtë ditë të parë
“Përtej dallimeve dhe kufijve gjeografikë, kemi një interes të përbashkët!”
Jean Monnet ishte i bindur se “kombet europiane duhej të bashkohen për të mbijetuar”. E njëjta gjë vlen edhe për Ballkanin Perëndimor. Për të ruajtur peshën në një botë që po ndryshon shpejt, duhet të forcojmë marrëdhëniet tona.
Bashkëpunimi është kryefjala.
Jam e nderuar të marr detyrën e Sekretares së Përgjithshme të Këshillit të Bashkëpunimit Rajonal dhe krenare që në një zonë ku për vite sfida ka qenë mbajtja gjallë e konfliktit, Këshilli i Bashkëpunimit Rajonal ka ndihmuar për fuqizimin e një realiteti të ri: atë të angazhimit të përbashkët të të gjitha vendeve të BP për të ardhmën europiane të rajonit.
Këshilli i Bashkëpunimit Rajonal ka qenë i suksesshëm në gjenerimin e një mbështetjeje të konsiderueshme për reformat në Europën Jug-Lindore, dhe kështu do vijojë të jetë!
Për këtë arsye jam e bindur se së bashku, nën drejtimin politiktë SEECP dhe mbështetjen e BE, duke përfshirë median, shoqërinë civile, ne do të përpiqemi të bëjmë zgjedhje tëmençura, që nxisin dialogun më të gjitha grupet në shoqëri.
Nuk do të jetë e lehtë, Do të jetë një sfidë si të notosh mes situatash të vështira ekonomike, shoqërore dhe politike.
E ardhmja e rajonit lidhet ngushtësisht me ndërlidhjen.
Integrimi i ekonomive tona në një treg të vetëm, lidhja e njerëzve dhe bashkëjetësa e vlerave; investimi në kapitalin njerëzor dhe intelektual, -çdo reformë lidhet me interesin tonë të përbashkët politik, atë të sigurisë dhe dukshëm me atë ekonomik.
Jam e bindur që ritmi i zhvillimit rajonal do të ndikojë në ritmin e integrimit tonë europian, për mua është një privilegj shumë i madh që do të drejtoj KBR ( RCC),po aq sa është një sfidë të cilën bashkë me përkushtimin e stafit të të Këshillit të Bashkëpunimit Rajonal shpresoj ta përballoj faqebardhë!
https://www.facebook.com/majlindabregu.al/videos/490516558137582/
