Për median malazeze "CDM", Sekretari i Përgjithshëm i Natos, Jens Stoltenberg është shprehur se i vjen keq për vendimin që mori Kuvendi i Kosovës për transformimin e FSK-së në Ushtri, ndonëse Nato paralajmëroi dhe ngriti disa shqetësime për këtë rast.
“NATO mbështet transformimin e FSK-së brenda mandatit të tyre aktual. Me ndryshimin e mandatit, Këshilli i Atlantikut të Veriut do të duhet të rishqyrtojë nivelin e angazhimit të NATO-s në Forcën e Sigurisë së Kosovës. Të gjitha palët duhet të sigurojnë që ky vendim i bërë në kohë të gabuar nuk do të rrisë më tej tensione të rajon”, është shprehur Stoltenberg.
Më tej Stoltenberg ka nënvizuar se të gjithë aktorët politik në rajon duhet të fokusohen te progresi i reformave dhe dialogut.
“Unë kam folur me presidentin serb, Aleksandar Vuçiç dhe me kryeministrin kosovar, Ramush Haradinaj ku kam theksuar se është e rëndësishme që të ruhet qetësia dhe të injorohet çdo deklaratë ose veprim që mund të çojë në përshkallëzim. Në këtë kontekst unë mirëpres komunikim të vazhdueshëm në mes komandantin të KFOR-it, gjeneral Lorenc D’Zadari dhe kolegëve të tij në rajon”.
Stoltenberg ka shtuar se vazhdojnë të mbështesin plotësisht procesin e normalizimit të marrëdhënieve midis Beogradit dhe Prishtinës pasi është vendimtar për paqen dhe sigurinë rajonale.
