Shqiptari, me vendbanim prej kohësh në Padova të Italisë, është larguar prej aty pasi publikoi mesazhe kundër festës së Krishtlindjeve në profilin e tij në Facebook, si dhe për shkak të lidhjeve me imamë të arrestuar në Kosovë për terrorizëm e nxitje të urrejtjes raciale. Ministria e Brendshme Italiane ka bërë të ditur se shqiptari, Shaban Caca akuzohet për aktivitet antisemit ekstremist si dhe konsiderohet një person i rrezikshëm për sigurinë kombëtare. Ai është shoqëruar në kufirin shqiptar me ndalimin e hyrjes në territorin italian për 10 vitet e ardhshme.
Antiterrorizmi italian i Policisë së Padovës në bashkëpunim me shërbimet e inteligjencës ka kryer hetimet ndaj tij. Së bashku me shqiptarin e dëbuar është sinjalizuar si person i rrezikshëm dhe një tjetër emigrant shqiptar me statusin e azilkërkuesit. Ai është dorëzuar nën mbikëqyrje speciale në një kamp refugjatësh e vendimi ndaj tij do të merret nga Komisioni për të drejtën e Mbrojtjes Ndërkombëtare.
Në rast se ky Komision vërteton se shqiptari nuk ka të drejtën e mbajtjes së statusit të azilkërkuesit, edhe ndaj tij do të lëshohet urdhri i dëbimit nga territori italian.
Ministri i Brendshëm Matteo Salvini ka falenderuar autoritetet policore të Padovës duke u shprehur se “Në Itali nuk ka më hapësirë për këdo që përpiqet të sjellë luftën brenda shtëpisë sonë”.
