Vëllai i vogël i 17-vjeçares të vrarë dje në Laprakë, i ka kushtuar të motrës disa fjalë të ndjera, pas largimit të saj nga jeta.
“Nuk prisja që të kisha një humbje tjetër aq të thellë. Mendova se do kalonim një jetë plot gëzime dhe tani m’le vetëm disa kujtime që më marrin frymën dalëngadalë. Ishe botë me vete për mua dhe do mbetesh plagë në zemër përjetë. U prehsh në paqe dashuria ime, motra ime. Të dua pafundësisht. R.I.P”, shkruan ai për 17-vjeçaren Briselda Gjikolaj.
Briselda Gjikolaj ndodhej në makinë me të dashurin e saj, 23 vjeçarin Erion Benga, në momentin që u qëllua për vdekje. Benga mbeti i plagosur prej goditjes me pistoletë, ndërsa e dashura e tij, Briselda nuk mundi të mbijetonte. Ajo ka ndërruar jetë në Spitalin e Traumës. Policia dyshon se autor i kësaj ngjarje është një 19 vjeçar, i cili ka qenë disa momente para vrasjes në të njëjtin lokal me çiftin, ku ka patur dhe një konflikt me Bengën, pasi autori i krimit ka ngacmuar 17 vjeçaren.
