Teuta nuk mundet përsëri dhe e mbyll 2018 me një ecuri spektakolare prej 11 ndeshjesh pa humbje, pas barazimit 1-1 me Lacin, por ai në Niko Dovana nuk ishte një rezultat që ngazëllen Bledi Shkëmbin dhe të tijtë. Diferenca mes durrësakve, që fiksojnë ndeshjen e 11 pa humbje në kampionat dhe kurbinasve mbetet 3 pikë por ajo që rrezikojnë të shohin durrësakët në Krishtlindje është imazhi që largohet i kryesuesve.
Pa Bicajn durrsakët e Shkëmbit e pa Xhixhën, që ka plotësuar numrin e kartonave të verdhë, Prenga, që përshtatjen me kurbinasit e pati të shpejtë, duke e njohur skuadrën që në verë. Ngjajnë në mënyrën si kërkojnë të imponohen në territory të dyja skuadrat, që luftojnë në cdo top dhe kujdesin e kanë lënë në plan të dytë.
Teuta e donte fitoren, duke e kuptuar se nuk mund të linte pikë në shtëpi dhe në fraksione loje u duk se mund tia dilte, aq sa harroi të kujdesej për një si Shtubina, në Lac gjithnjë deciziv dhe i rilindur. Kanë rezerva në golin e shkodranit futbollistët e Teutës, duke kërkuar një pozicion të parregullt të tij në pasimin e Fangajt, por Hamiti vazhdoi lojën.
Nervoz reagimi i durrësakëve që kishin harruar ndjesinë e të qenit në disavantazh: Progni nuk gjeti kuadratin në fund të pjesës së parë, ndërsa nuk bëri më mirë edhe Kallaku sapo rifilloi loja. Teuta shfrytëzoi faktin që Laci i la lojën në dorë dhe me qarkullim të shpejtë dhe me vertikalizimet për Latif tentoi të kthehej në lojë, edhe pse zgjidhja erdhi nga aftësia individuale e Kallakut, tre minuta nga fundi.
Spektakolar mesfushori i ri në goditjen e dënimit, që bëri të dorëzohej edhe Selmani, i pafuqishëm në këtë rast. Keqardhje për kurbinasit që u duke se arritën fitoren që do ti barazonin me Teutën dhe do ti afronin edhe më shumë me zonën Europiane.
