Të enjten në mbrëmje në parlament është vulosur një nga grabitjet më të mëdha të shqiptarëve.
Shumica socialiste ka votuar unanimisht për të zbritur tatimin e dividentit që ndajnë aksionerët e një kompanie, nga 15/%, në 8% për më të kamurit e këtij vendi.
Dhe këtë dhuratë nuk e ka bërë për vitet që vijnë, çka edhe nëse do të ishte imorale, nuk do të përbënte ligjërisht një krim.
Por, e ka bërë edhe për vitet e mëparshme, duke kryer krimin e shfuqizimit me efekt prapaveprues të një takse dhe duke vendosur një pabarazi skandaloze mes atyre që kanë ndarë dividend në vitet 2015, 2016, 2017 dhe atyre që nuk e kanë ndarë atë (Lind pyetja, a mos duhet të kthejnë kusurin e parave për ata që kanë paguar tatim mbi dividentin 15% në këtë perudhë).
Po kjo vjedhje skandaloze, të cilën kreu i grupit parlamentar të LSI-së, Petrit Vasili (shiko videon poshte), e konsideroi si një “ndarje parash mes Ramës dhe oligarkëve para festive”, nuk mbaron këtu.
Si një krim i dhunshëm, ai nuk pyet për dëmet kolaterale, shkeljet e ligjit dhe procedurat që përdhos.
Sepse socialistët, pra të majtët që erdhën në pushtet me premtimin për të zvogëluar pabarazinë mes të pasurve dhe të varfërve të këtij vendi, e kishin votuar që në 3 dhjetor përgjysmimin e tatimit mbi dividentin.
Por, këtë të enjte presidenti Meta e ktheu ligjin mbrapsht duke nënvizuar shkeljet e tij kushtetuese.
Dhe çfarë bënë deputetët e Rilindjes që janë shndërruar në shërbëtorë të oligarkëve?
Nëpërkëmbën çdo procedurë.
Sepse një ligj i kthyer nga presidenti me regullore fillimisht i dërgohet komisionit përkatës, në këtë rast atij të ekonomisë, i kryesuar nga “jakobini i pakorruptueshëm” Erion Braçe. Po sipas rregullores, ky komision është i detyruar të hartojë një raport 48 orë përpara se ligji të rishqyrtohet në seancë. Ai është i obliguar që gjatë shqyrtimit të thërresë për dëgjim edhe përfaqësuesit e presidencës që e kanë kundërshtuar ligjin.
Andi Bushati: Taksat që Rama po i fal oligarkëve
Po çfarë ndodhi dje?
Brenda ditës (më saktë në 16 30) “jakobini i pakorruptueshëm” e mblodhi në një zgëqe komisionin, pa lajmëruar opozitën, pa thirrur juristët e presidencës dhe pa përfillur afatin 48 orësh.
Ai vendosi rrëzimin e dekretit të presidentit. Në ora 20 00 Taulant Balla e depozitoi ligjin në sekretarinë e kuvendit që normalisht nuk ishte më në orar zyrtar. Dhe në ora 22 00 të natës të së enjtes delet e Edi Ramës ngritën duart për herë të dytë për të ulur dividentin nga 15% në 8% duke i falur miliona euro një grushti oligarkësh.
Pyetja është: Pse ky ligj amoral nga një qeveri e majtë që bën sikur nuk ka para për studentët dhe banorët e Astirit? Dhe mbi të gjitha pse ky nxitim dhe kjo shkelje e çdo procedure? Mos vallë për të ndarë paratë e atij 7% tatim mbi dividentin që u falet oligarkëve? Mos ndoshta Petrit Vasili ka të drejtë kur ftet për shpërndarjet e pakove para vitit të ri?
©Lapsi.al
[embed]https://www.facebook.com/petritvasil/videos/1126350530860795/?t=11[/embed]
