Projekligji i shumëdebatuar mes të majtëve dhe të djathtëve është rrëzuar këtë të premte në parlament me forcën e kartonëve të shumicës së PS. Parlamenti ka votuar me 74 vota kundër rrëzimin e propozimit të opozitës për të bërë një vetting ndaj politikanëve shqiptarë. Nisma mori 52 vota pro ndërsa 10 deputetë nuk morën pjesë në votim.
Ligji parashikonte ndryshime kushtetuese dhe ngritjen e një procesi që do të fuste në filtër pastërtinë e figurës së politikanëve të zgjedhur nga partitë politike. Sipas opozitës ligji do të sillte aspekte pozitive dhe do të kthehej në një tjetër mburojë ligjore për të mbajtur larg politikbërjes persona me precedentë penalë apo të lidhur me botën e krimit.
