Ekspertët mendojnë se të paktën në periudhë afatshkurtër, Shqipëria nuk ka fuqi financiare të shpenzojë 5 për qind të prodhimit kombëtar për arsimin. “Ai është një objektiv që mund të realizohet ndoshta në një dekadë”,- thotë Zef Preci.
“Ky është një objektiv afatmesëm. Dyfishimi i menjerëhershëm do të ishte i dëmshëm sepse do të shkonte direkt në rritje të borxhit”,- shprehet Arben Malaj.
Zef Preci thotë se, shkaku kryesor i krizës së arsimit nuk është buxheti i ulët, por politikat e gabuara të qeverive dhe kapja e sistemit nga interesa të ngushta.
“Duhet te shohim ca kemi bere 15 vitet e fundit se te gjitha qeveritë i kanë futur duart tek arsimi për interesa të ngushta. Problemi kryesor është se iu larguan Kartës së Bolonjës”,- shton ai.
Arben Malaj solidarizohet me protestën e studentëve. Por sipas tij, kërkesat e tyre duhet të synojnë përmirësimin e cilësisë së arsimit dhe të shmangin populizmin. Por si mund të ndërtojë Shqipëria një sistem më të mirë arsimor? “Sfida kyçe janë stafet. Nga parashkollori deri në Universitet”,- shprehet Malaj.
Familjet shqiptare shpenzojnë qindra milionë euro në vit për arsimimin e fëmijëve në universitet. Por për shkak të cilësisë së dobët të mësimdhënies, pjesa dërrmuese e diplomave nuk njihet në vendet e tjera./TCh/
