Banorët e “Astirit” kanë tentuar t’i bashkohen protestës së studentëve, por duke kërkuar të drejtat e tyre, pra për kauzën e tyre.
Kjo gjë i ka irrituar studentët, të cilët janë shprehur se do të bëhen gardh e nuk do t’i lejojnë banorët e “Astirit” që t’i bashkohen protestës.
“Jo ne do të bëhemi gardh studentësh. Dhe nuk ndalojmë. Ata mund të na bashkohen vetëm nëse dalin me pankartat tona dhe thirrjet në mbështetje tonë”, u shprehën studentët.
Pavarësisht kësaj, banorët e “Astirit” ia dolën të depërtonin në mes të turmës. Kjo gjë solli një konflikt mes studentëve dhe tyre.
“Nëse banorët e Astirit duan të bashkohen të vijnë si qytetarë dhe të bëjnë thirrje për plotësimin e kërkesave tona. Nëse do të vinin të bashkohen me ne ata të bashkoheshin që në mëngjes protestës tonë”, thonë studentët për mediat.
Një prej banorëve u shpreh se ata kanë ardhur për solidaritet me studentët dhe jo për të mbrojtur kauzën e tyre.
“Protesta jone është pasdite, ne kemi ardhur për solidaritet. Kërkesat tona janë ekonomike, po mbrojmë shtëpitë”, u shpreh ai.
