Numri i ndërtesave të shembura për projektin e Unazës së Re ka arritur në 15. Protestat vijojnë në të gjithë zonat e Tiranës ku shtrihet ky projekt.
Deri më tani ndërtesat e shkatërruara janë ato informale, pronarët e të cilave nuk kanë patur dokumentacion të rregullt.
Në afërsi të ish-sheshit “Shqiponja” deri më tani janë shkatërruar vetëm dy ndërtesa.
Pronari i njërës nga ndërtesat, zoti Bajram Nela, është shprehur se veprimi i kryer ndaj shtëpisë së tij ka qenë i padrejtë.
Që nga 2005 Nela ka aplikuar për legalizimin e banesës së tij, pa e marrë asnjëherë çertifikatën e pronësisë.
Pavarësisht përplasjes me policinë dhe kundërshtimeve, ndërtesa e Bajram Nelës u shkatërrua.
“Në 2005 kam aplikuar për proces legalizimi, por ajo certifikatë nuk mua dha kurrë. Ky është një veprim i pa drejtë pasi unë e kam ankimuar dhe policia nuk mund të veprojë derisa të shprehet gjykata”, u shpreh Nela.
Sa i takon objekteve të ligjshme, ato do të shemben menjëherë pasi të mbarojë puna me rrëzimin e objekteve të paligjshme. Për momentin vlera e tyre po matet nga grupi i vlerësimit për kompensim i ARRSH-së, i caktuar me kompetenca të plota për vendosjen e dëmshpërblimit të merituar për secilin banor.
