Një tjetër ministre në qeverinë Rama akuzohet për plagjiaturë. Këtë herë bëhet fjalë për Ministren e Shëndetësisë dhe Mbrojtjes Sociale, Ogerta Manastirliun.
Kërkimi shkencor origjinal në Universitetet shqiptare përflitet masivisht se është pranë zeros, ndonëse ata që mbajnë titull “doktor shkencash” shtohen me disa dhjetëra çdo vit.
Këtë radhë, pre e investigimit të artikujve shkencorë ka rënë ministrja Manastirliu. Doktoratura e vjedhur i përket zonjës Fannie Mnisi, e cila kishte botuar në Afrikën e Jugut punimin e saj shkencor referuar një landfilli atje.
Ogerta Manastirliu, ka realizuar një punim të ngjashëm doktorature, për landfillin e Sharrës në Shqipëri, duke marrë pjesën teorike prej punimit origjinal, gjithashtu dhe fotot e bashkangjitura. E vetmja gjë e ndryshuar ka qenë prapashtesa “i Sharrës” pas fjalës landfilli.
Lëvizja për Universitetin është ajo që ka bërë publike vjedhjen e punimit prej ministres Manastirliu, krahas punimit origjinal.
Raste të tilla plagjiature nga të doktoruarit në qeveri kemi hasur dhe disa javë më parë, kur Taulant Muka denoncoi publikisht një plagjiaturë të zv.Ministri të Arsimit asokohe, Ervin Demos.
Pas këtij denoncimi, zv.ministri Demo dha dorëheqjen.
Në rastin e zv.ministrit të Arsimit, kryeministri Rama e pranoi precedentin, duke shtuar se në të tilla raste personat e përfshirë duhet të japin dorëheqjen.
Në denoncimin e zv.ministrit pasues Muka, që dha dorëheqjen disa ditë pas emërimit në këtë post, përmendej dhe deputjetja e PS-së, Blerina Gylameti, e cila nuk ka reaguar ende pas këtij skandali.
