Pas shfaqjes në Pejë ku Rama dhe Haradinaj e mbështetën fort taksën politike kundër mallrave serbe, në kundërshtim me BE dhe duke sfiduar Brukselin, Mero Baze ka shkruar një editorial plot thumba për këtë nismë.
Në thelb ai thotë se nuk mund të nisesh si burrë në betejë dhe të presësh edhe trëndafilat e atyre që ke kundër. Madje ai shkon më tej duke e quajtur shfaqjen Rama-Haradinaj si një qëndrim kundër të ardhmes në BE: “…të gjithë jemi të qartë se ky është një qëndrim kundër perspektivës europiane të Kosovës. Biles e tillë është dhe shfaqja patriotike Rama- Haradinaj në Pejë.
Tani, nëse nisesh për luftë kundër armikut tënd, pa diskutim që duhet të përgatitesh për sakrifica. Sakrifica e parë natyrisht mbeten vizat dhe kundërshtia e Europës për këtë rrugë”, - thotë ai në shkrimin e gazeta Tema: “Zemërimi fallco me komsionerin Hahn”.
Por duke përmendur të gjitha pasojat që mund të ketë lufta, si tregtare po ashtu edhe politike Baze ka një paralajmërim për dyshen Rama Haradinaj: “Po mos thoni që nuk i dinim këto. Luftë vetëm për lavdi për të dalë në faqe të shtypit nuk ka”. ©Lapsi.al
