Katër persona, mes tyre një doganier në pikën e kalimit kufitar të Kapshticës janë arrestuar pasi akuzohen për kontrabandë mallrash.
Policia thotë se u arrestua shtetasi L. K, 59 vjeç, banues në Sovjan Maliq, me detyrë doganier pranë Doganës së Kapshticës.
"Ai akuzohet për "Shpërdorim detyre" pasi lejoi kalimin e 4 mjeteve me mall të dyshuar kontrabandë, pa ushtruar kontrollin përkatës", thuhet në njoftimin e policisë.
Po ashtu u arrestuan edhe R.Sh, 29 vjeç, K. M 23 vjeç, P. V, 45 vjeç, si edhe u shpall në kërkim shtetasi G.M, 29 vjeç, banues në Bilisht Devoll.
"Shtetasit e mësipërm, janë kapur në Bilisht, me mjetet e tyre respektive në të cilat iu gjetën të ngarkuara mallra të dyshuara kontrabandë (fruta të thata) të cilat kanë kaluar nga Pika e Kalimit Kufitar të Kapshticës ku shtetasi L.K, dyshohet të ketë shpërdoruar detyrën duke mos zbatuar procedurat e kontrollit të këtyre mjeteve", sqaron policia.
Materialet për hetime të mëtejshme i kaluan Prokurorisë të Rrethit Gjyqësor Korçë për veprat penale bazuar në nenet 248 e 174 të Kodit Penal.
