Televizioni gjerman ARD i ka kushtuar një reportazh ekspozitës së kryeministrit Edi Rama në Gjermani me punimet e tij personale. Ekspozita është hapur në qytetin e Rostockut. Duke folur për ARD, Rama s’e ka shmangur modestinë, duke u shprehur se ai mbetet kryeministri më i mirë i të gjitha kohërave në Shqipëri.
“Buxheti që mu dha ishte asgjë. Ishte asgjë. Diçka. Shumë pak. Por duhej bërë ndryshimi. Filloi rritja e mbledhjes së taksave dhe ndryshimi i niveleve. Tani jam Kryeministri më i mirë i të gjitha kohërave, në Shqipëri. Unë jam artisti më i mirë në rrethin e kryeministrave dhe Kryeministri më i mirë në rrethin e artistëve”, thotë Rama.
Më tej në reportazh kryeministri shqiptar flet edhe për jetën e tij personale, duke shfaqur imazhe me bashkëshorten Linda dhe djalin Zaho. Ekspozita është hapur më 17 nëntor dhe do të qëndrojë e hapur deri më 6 janar. Kjo nuk është ekspozita e parë e Ramës. Në këto 5 vite si kryeministër, ai i është prezantuar gjithashtu botës edhe si një piktor shëtitës, me ekspozita në disa vende të ndryshme.
©LAPSI.al
