Pas shpalljes së pavarësisë më 17 shkurt 2008, qytetarët e Kosovës iu ishin drejtuar kutive të votimit për herë të parë si shtet i pavarur një vit më vonë.
Më 15 nëntor të vitit 2009, u mbajtën zgjedhjet e para në Kosovën si shtet i shpallur. Zgjedhjet e 9 viteve më parë u vlerësuan përgjithësisht si të lira dhe të drejta me një numër të konsiderueshëm të parregullsive.
Shefi i Misionit Ndërkombëtar të Vëzhgimit të Zgjedhjeve në atë kohë në Kosovë, Darko Aleksov, gjatë prezantimit të raportit paraprak të vëzhguesve pati thënë se ishin vërejtur edhe një numër parregullsish.
“Prania e gjerë e votimit familjar që është vrojtuar, jo vetëm që është kundër ligjit, por paraqet një shkelje serioze të parimit të rëndësishëm të fshehtësisë së votimit”, pati deklaruar Aleksov.
Në këto zgjedhje, Partia Demokratike e Kosovës pati fituar në dhjetë komuna, Lidhja Demokratike e Kosovës në pesë, ndërsa Aleanca për Ardhmërinë e Kosovës në tri komuna.
Zyrtarisht zgjedhjet e para të lira në Kosovë janë ato të 28 tetorit 2000, vetëm një vit pas luftës. Por, ndonëse në kushtet e represionit serb, shqiptarët e Kosovës votuan për herë të parë në vitin 1992.
Edhe në mungesë të lirisë dhe një organi ligjvënës, Kosova zgjodhi në ato vite të vështira deputetet e vetë dhe atë që u njoh si “Qeveria në ekzil”
