Një ditë pas vrasjes që tronditi Shkodrën, në kryeqendrën e veriut kanë zbarkuar zyrtarë të lartë të Policisë së Shtetit dhe një prokuror i Krimeve të Rënda. Ekzekutimi në mes të qytetit i Fatos Ferracakut ku u plagos edhe Fatmir Mehaj ndodhi në tregun e lagjes “Rus” pak para mesdites së të martës.
Mëngjesin e sotëm ka udhëtuar nga Tirana, drejtori i Krimeve Niko Brahimi, nëndrejtori i përgjithshëm i Policisë dhe drejtor për rendin Gjovalin Loka, njëkohësisht ish-drejtor në policinë e Shkodrës. Atyre mësohet se u është bashkuar edhe një prokuror i Krimeve të Rënda. Fillimisht po analizohet nëse ngjarja duhet t’i bashkohet hetimeve që po bëjnë Krimet e Rënda për vrasjet e kohëve të fundit në Shkodër. Krerët e lartë të policisë janë në Shkodër edhe për të analizuar dhe thelluar hetimet lidhur me ngjarjen e rëndë.
Ende policia nuk ka asnjë autor të dyshuar për vrasjen e Ferracakut dhe plagosjen e Mehajt, të cilët u qëlluan nga një person. Ai fillimisht hapi zjarr nga distanca kur Ferracaku po tregtonte peshk në markat dhe pasi ai u rrëzua në tokë, autori u afrua dhe e qëlloi edhe nga afër. Ai ka pasur një xhaketë ngjyrë të kuqe veshur, sipas dëshmive të tregtarëve që kanë parë ngjarjen e rëndë.
Dëshmitarët thanë se Mehaj u plagos në këmbë pasi tentoi të ndërhyjë. Një bashkëpunëtor e priste autorin me motor dhe pak pas krimit të dy u larguan nga vendi i ngjarjes. Vrasësit mbanin në kokë skafandra të errëta. Motori u gjet i djegur në zonën periferike të qytetit në lagjen e njohur me emrin “Guerrile”. Deri tani ka rreth 20 të shoqëruar të cilët kanë deklaruar se nuk kanë dijeni për autorët.
Mbetet i vështirë identifikimi për shkak se nga pamjet e verifikuara përmes kamerave, skafandrat nuk lejojnë të dallohen fytyrat e autorëve apo ndonjë tipar i veçantë. ©LAPSI.al
