Quhet Dobrosav Gavriç. Serbi po kalon ditët pas hekurave në Afrikën e Jugut, shumë larg nga atdheu i tij duke pritur vendimin përfundimtar për ekstradimin. Ai akuzohet si autori i vrasjes së udhëheqësit famëkeq paramilitar të luftërave të viteve “90, Zeljko Raznatoviç, i njohur si “Arkani”.
Gavriç u dënua me 35 vite burg në vitin 2000 në Beograd, por ndërkohë ai ishte arratisur në Afrikën e Jugut për të shmangur vuajtjen e dënimit.
Tani po pret ekzekutimin e vendimit të Gjykatës Kushtetuese të Afrikës së Jugut e cila vendosi në fund të shtatorit se ai mund të kthehej në Serbi, edhe pse ai kishte argumentuar se jeta e tij do të ishte në rrezik në atdhe.
Gavriç u kap në Afrikën e Jugut në vitin 2011 pas një incidenti ku mbeti i plagosur. 4 serbë të tjerë që u dënuan për përfshirjen në vrasjen e Arkanit janë vrarë. Tre janë ekzekutuar në Afrikën e Jugut, një tjetër në Beograd.
Disa nga viktimat kishin ikur nga Serbia për të mos shkuar në burg, por vendi në të cilin ata shpresonin se do mund t’i iknin ligjit, u bë vendi ku gjetën vdekjen.
Vetëm Gavriç mbijetoi, por tani një burg serb duket se e pret. Kishte shpresuar se do të bente jetën e një gangësterri në arrati, por nuk e pati të lehtë. Arkani ishte komandant i Gardës Vullnetare Serbe, e ashtuquajtura “Tigrat”. Ai u vra në 15 janar 2000 në hotelin “Intercontinental” të Beogradit.
