Kryeministri Edi Rama ka zbuluar përfundimisht përgjigjen që i ka dërguar Presidentit të Republikës Ilir Meta për lënien pezull të Sandër Lleshit si ministër të Brendshëm. Ishte kreu i shtetit që fillimisht publikoi letrën që i kishte drejtuar Ministres së Mbrojtjes, Olta Xhaçka ku kërkonte sqarime për pozicionin e gjeneralit.
Meqë Meta e bëri çështjen publike edhe Rama iu drejtua në të njëjtën mënyrë. “Duke qenë se Presidenti ka publikuar shkresën me pyetjen e tij të ndarë në plot 14 pyetje, ja edhe shkresa ime lidhur me pyetjen e Tij. Kjo ka bashkëlidhur një kërkesë të gjeneral Sandër Lleshit për Presidentin, e cila e shterron fare këtë vorbull të panevojshme. Lexim të mbarë” – shkroi Rama që e fshiu për disa minuta postimin për ta rikthyer sërish pak minuta më pas.
Dokumenti mban datën 12 nëntor dhe Rama shkruan “se ndihet i keqardhur për faktin që Meta nuk i bëri që herën e parë këto pyetje për të mos pësuar krisjen”. Rama shton se ekspertët e tij e kanë këshilluar se edhe në rast se Lleshi mban detyra në Forcat e Armatosura ai do të largohej prej tyre vetëm pasi të dekretohej si ministër. ©LAPSI.al
