Ngjarjet e shëmtuara në fundin e takimit në Selman Stërmasi, në ndeshjen mes Tiranës e Kukësit, ku tifozët kaluan barrierën dhe thyen rezistencën e forcave të sigurisë i kanë kushtuar Tiranës dy ndeshje pa tifozë. Komisioni i Disiplinës është kthyer tek dënimi i preferuar, atë të stadiumeve bosh. Ndoshta këtë herë ishte vendimi më i drejtë për tu marrë, në kohën kur ka mungesë alternativash dhe nuk mund të penalizojë individët fajtorë për invazionin e fushës.
Dy ndeshje pa tifozë për dështimin në përmbushjen e përgjegjësive dhe për sjellje të gabuar të spektatorëve të cilët u futën brenda pjesës së rrethuar të fushës duke shkaktuar akte dhune ndaj lojtarëve. Ky është përcaktimi i Disiplinës, që kështu bëhet aq e butë, sa Tirana edhe mund të mos e apelojë fare dënimin. Dy ndeshje e më tepër Komisioni i Disiplinës i ka dhënë edhe për banderola të shfaqura, apo për shishe plastike uji të hedhura në fushë, pa përmendur Flamurtarin që u dënua katër ndeshje pa tifozë sepse ofendoi presidentin e FSHF-së Armand Duka.
Tirana vetëm një ndeshje më parë, ishte penalizuar me mbylljen e sektorit të ultrasve, pas banderolës ofensive për presidentin Refik Halili në ndeshjen e luajtur në Tofik Jashari në Shijak kundër Teutës.
Vendimi i Komisionit të Disiplinës së FSHF datë 09.11.2018
1. KF “Tirana”, për dështimin në përmbushjen e përgjegjësive, për sjellje të gabuar të spektatorëve duke u futur brenda pjesës së rrethuar të fushës dhe duke shkaktuar akte dhune ndaj lojtarëve, në bazë të Nenit 66/3/a të KDS, dënohet me zhvillimin e 2(dy) ndeshjeve pa spektatorë në stadiumin përkatës.
2. Lojtari i FK “Tërbuni”, Denis Taku, për sjellje të keqe ndaj zyrtarit të ndeshjes, në bazë të Nenit 49/1/a të KDS, dënohet me 4 (katër) ndeshje pezullim nga aktiviteti.
3. Lojtari i KF “Devolli”, Ardit Jaupaj, për provokim të publikut dhe sjellje të keqe ndaj zyrtarit të ndeshjes, në bazë të nenit 53/1 dhe 49/1/a të KDS, dënohet me 6 (gjashte) ndeshje pezullim nga aktiviteti.
4. KF “Delvina”,për sjellje të gabuar të tifozëve, në bazë të nenit 13/1 të KDS paralajmërohet se në rast përsëritje të sjellje të tilla do të jetë subjekt i ndëshkimeve që parashikon Kodi i Disiplinës Sportive.
5. Lojtari i SHS “Përmeti” Xhuljo Mamushi për sjellje të gabuar ndaj kundërshtareve të ndeshjes dhe për ofendime ndaj zyrtarëve të ndeshjes në bazë të neneve 48/1/d ,49/1/a dënohet me 4 (katër)ndeshje pezullim nga aktiviteti.
6. Lojtari i FK“Kamza” U-19, Albjon Alimema, për sjellje të gabuar ndaj kundërshtarit, në bazë të Nenit 48/1/d të KDS, dënohet me 2(dy) ndeshje pezullim nga aktiviteti
7. Lojtari i “Shkendija” T.B U-19, Bashkim Koleci, për sjellje te gabuar ndaj kundërshtarit, në bazë të Nenit 48/1/e të KDS, dënohet me 5(pesë) ndeshje pezullim nga aktiviteti.
8. Lojtari i “Term FC” U-19 Gentjan Noka për sjellje të gabuar ndaj ekipit kundërshtar në bazë të nenit 48/1/d të KDS dënohet me 2(dy) ndeshje pezullim nga aktivitetet futbollistike.
9. Zyrtari i KF “BRIANS” U-17,Aldi Shyti, për protesta ndaj zyrtarit të ndeshjes, në bazë të Nenit 56/1/a të KDS, dënohet me 2(dy)ndeshje pezullim nga aktiviteti.
10. FC “Bylis” U-17,për mosparaqitje në ndeshje në bazë të nenit 55/1 të KDS, dënohet me humbjen e ndeshjes në tavolinë me rezultatin 3-0 (tre me zero).
11. Lojtari i FK “Tomori” U-17,Remino Nazeraj, për sjellje të keqe ndaj zyrtareve të ndeshjes ,në bazë të nenit 49/1/a të KDS, dënohet me 4(katër)ndeshje pezullim nga aktiviteti.
