Detaje të reja zbulohen pas arrestimit të autorit të dyshuar të vrasjes së 32-vjecarit Emiljano Boçi si dhe plagosjes së shokut të tij Melvin Disha në Tiranë në 16 janar 2018.
Autori i dyshuar, 30-vjeçari Tori (Hektor), për të cilin policia dyshon se është vrasës me pakesë, ka qenë për më shumë se 6 muaj në hetim. Burime të Lapsi.al bëjnë me dije se Xhecuka ka jetuar në një banesë me qera në zonën e '21 dhjetorit' gjatë kësaj periudhe, ndërsa ka dalë ilegalist në Kosovë dhe në Greqi.
Autori i dyshuar i vrasjes u arrestua në Kakavijë. 30-vjeçarit nuk iu gjet asnjë send i paligjshëm. Policia i ka sekuestruar vetëm 2 telefonë, që po u kryhet ekspertiza.
Tori Xhecuka nuk e ka pranuar akuzën para policisë. Ai ka kërkuar avokat dhe nuk ka pranuar të pyetet më tepër.
Njoftimi i policisë për arrestimin:
Policia e Tiranës në bashkëpunim me Prokurorinë e Rrethit Gjyqësor Tiranë identifikojnë autorin e dyshuar të ngjarjes se ndodhur më 14 Janar 2018 ku mbeti i vrarë Emiljano Boçi.
Identifikimi i autorit të dyshuar pas një hetimi disa mujor me metoda speciale të hetimit nga Seksioni për Krimet e Rënda në Drejtorinë Vendore të Policisë Tiranë në bashkëpunim me Prokurorinë e Rrethit Gjyqësor Tiranë.
Kapet dhe vihet në pranga Tori (Hektor) Xhecuka, 30 vjeç, lindur në Burrel dhe banues në Tiranë, për veprën penale të “Vrasjes me paramendim” e kryer në bashkëpunim dhe të “ Prodhimit dhe mbajtjes së armëve luftarake”.
30-vjeçari është autor i dyshuar i ngjarjes së ndodhur në datën 14 Janar 2018 në rrugën “Shefqet Musaraj”, ku mbeti i vrarë shtetasi Emiljano Boçi, si dhe autor i dyshuar i “Vrasjes së mbetur në Tentativë” të shtetasit Melvin Disha.
Për arsye hetimi në funksion të zbardhjes së plotë të kësaj ngjarje, nuk bëhen me dije detaje të tjera.
